Намар гэх өгөгдөл

Анх удаа л гэрээсээ өөр газар ахин дахин очих мэдрэмжийг надад өгсөн. 10 жилийн анхны намар надад найз нөхөд, нандин үерхлийн эхлэлийг тавьсан.

Анх удаа л тэнгэрээр алхаж, түүнээсээ өөр зүйл бодолгүйгээр нэг газарлуу явсан. Харин буцаж ирэхдээ гунигыг, уйтгарыг өөртэйгөө хамт аваад ирсэн. Намар надад ганцаардалыг өгсөн.

Анх удаа л өөрийнхөө боловсролыг шалгуулсан. Түүнээс хойш олон зүйлд боловсрол минь өндөрдөх болсон :P. Намар надад шинэ амьдралыг бэлэглэсэн.

Анх удаа л бусдын бодлыг чихээрээ биш нүдээрээ унших болсон. Түүний дараа би өөрөө бодлоо бичдэг болсон. Намар надад өмнө өгсөн бүх зүйлээ бүгдийг нь ахиж шинээр өгсөн. Энэ л намар намайг энд хүргэсэн. Энэ л намар надад эрхэм. Энэ л намрыг би үүрд дурсана.

Намрын тухай бүх дурсамж минь биш ч надад өгсөн нандин бүхэн минь.

2011/08/30 15:17  

Кайф

Амьдрал яг нэг хэвийн болоод ирэхээр л ингээд хоол нь амьтгүй, хорвоо нь өнгөгүй, хүмүүс нь сонирхолгүй, хүн чанаргүй(энэ хэсэгт зүгээр л толгой холболт хийсэн болно :P)  блог нь бичлэггүй болоод ирдэг байхгүй юу. Уг нь бол юм бичмээр л байгаан тэгсэн даан ч яасан нэгэн хэвийн өдөр хоногууд урссаар, цуварсаар, өнгөрсөөр л байна. Амьдралын амт шимт бал бурмыг амсаж явах насан дээрээ ийм юм бичээд сууж байх ч гэждээ ишшш чааваас гэж :( . Уг нь адармаатай, адал явдалтай, асуудалтай байвал өрнөлтэй, өнгөтэй, тэмцэлтэй байх гээд байна шд. Цагын сайханд даакласан, далдайсан, дарвайсан, аз нь шовойсон, од нь гийсэн, адтай, алаг нүд нь эргэлдсэн тэр хүн нэгхэн зуны дотор духандаа үрчлээ нааж, насандаа намба зааж, харьцаандаа соёл шааж, тооцоотой, томьёотой, туршлагатай, нурмайсан, унжийсан, навсайсан л юм явдаг болчхымаа.

Одоогын энэ өндөрлөгөөс эгц доош харахад эрсдэл гэдэг чинь л амьдралыг сонирхолтой, үйл явдалтай, адармаатай, амттай болгохымдаа гэж. Алдана гэдэг чинь л өөрөө амьдралын кайф юм шүү дээ.

Амьдарсаар л... Батси

2011/10/14 00:12  

Мадлуулахвий

Ойрд Жоё, ЖиТулга, Элхан, ТайгарФиш, Цоомоо, Аниме гэх нөхдүүдтэй шатар тоглоод байсан чинь том болоод ухаан суугаад байгаа шд ккк. Бага байхдаа аавтайгаа хамт шатар тоглоно. Тоглох ч юу байхав буруу нүүлээ гэж загнуулна, баахан хожигдоно, шарандаа уйлна. Гэхдээ энэ бүгдээс олон санаа сурч амьдралдаа хэрэгжүүлж алдаж, онож байснаа санавшд. Үүнээс:

Шатар тоглоход эхлээд сурж ойлгодог зүйл бол ашигтай нүүдэл. Миний хувьд ашигтай нүүдэл гэдэг нь ихийг багаар солих, илүү идэх болж өгвөл шууд мадлах. За тэгээд ашигтай нүүхийг амьдрал дээр хэрэгжүүлсэн туршлага: Бага байхад гэрийн ажил хийнэ гэдэг бол надад үнэгүй хөдөлмөрийн мөлжлөгө шиг л санагддаг байлаа. Тэгээд аав ээж намайг гэрийн ажил хийлгэх гэж харин би кармааны мөнгөтэй болохын тулд дундын гэрээ хийлээ. Би өрөөгөө өдөр болгон цэвэрлэнэ, тоосоо долоо хоногт 2оос доошгүй удаа соруулна, хүнс цуглуулна, хоол бэлтгэлцэнэ гээд л. Энэ бүхэн сайхан байлаа, цэвэрч, тусархаг, аав ээждээ халамжтай гэж дуудуулсныхаа төлөө мөнгө авна гэдэг бол нэг сумаар 2 туулай буудахтай л адил. Үлгэр төгсөх хүртлээ жаргалтай байдаггүйтэй адил эгч аав ээж 2той бага ашгын гэрээ хийж би албан шаардлагаар үнэ төлбөргүйгээр үйлчлэгч боловоо гэж. Сургамж: Амьдрал дээр 2 биш 6,7 тэрбум хүн шатар тоглодог. Өөрийн нүүдлээ нэг хүнд, нэг талаас нь биш олон хүнд олон талаас нь харж байж хий... ЗА

Дараачын ойлголт бол ашигтай байрлал. Ашигтай байрлал эзэлсэнээр айлын хүү, бод болон бэрсийг нүүдэлгүй болгох, монжоо гаргах, сул идэх гэх мэт маш олон давуу талтай. Миний амьдралын туршлага: Эмээ бид 2 бол эсрэг жилийн эсрэг ордонд төрсөн хүмүүс лдээ. Хамт амьдарч байх хугацаанд бол мөнхийн хэрүүл, тэмцэл, өрсөлдөөн, тулаан өрнөдөг байв. Эмээ ч 80 жилийн туршлага гээд над мэтийн залуу хүнийг өөртөө хавьтуулах ч гүй. Хамаатны бэрс, боднууд орж ирэнгүүт ноёныг цодолсон айлын хүү мэт л намайг ойлгуулаад л бариулж идүүлнэ. Талбайгаар дүүрэн эмээгийн цагаан талын хүү бод болон бэрснүүд тэр дунд нэг хар хүү. Юун ашигтай нүүдэл, талбай дээр зогсох нүд олдох нь уу? Тэгээд л тоглоомонд оролцохын тулд 100 хувь бууж өглөө. Тэгтэл би асар хүчирхэг цагаан талын хүү болон хувирах нь тэр. Намайг бэрс юм уу ямар нэг бод болгохын төлөө манай бэрс болон боднууд зам цэвэрлэж өгнө. Надтай адил хүүнүүд хойно урдаас хамгаалж явна. Би ч ноёноо хамгаалсан хүү болох нь тэр. Ингээд эмээ маань миний хамгийн сайн өрсөлдөгч, хамгийн сайн ар даагч болсымдаа. Сургамж: Хүү, бэрс юм уу бод болтлоо зөвхөн урагшаа л нүүдэг. Шалдан ноён мадлуулна уу гэхээс мадлаж чадахгүй. Өөрийн талын бод, хүү, бэрсгүйгээр ашигтай байрлал гэж хэзээ ч байхгүй. Ашигтай байрлалыг хүн ганцаараа биш олуулаа байсны дүнд гаргадаг...

Гэх мэт хүн олон зүйлийг шатарнаас ойлгож авах боломжтой. Миний түүх, сургамж ч үүгээр дуусаагүй... Нүүдэл байгаа цагт хүн нүүж л байдаг. Амьдралын шатар тоглоомноос нэг л зүйлээрээ ялгаатай. Амьдрал дээр тэнцдэггүй юм.

Нүүсээр л Батси

2011/10/17 15:28

Батси цаг хугацааны машинтай байсан бол...

Хүн болгонд л дурсамжаасаа бүүр хасаад хаячихмаар түүхүүд байж л байдаг байх. Надад бол байдаггүймөө гэшаассс :P ккк. Би тэгээд бодлоолд хэрвээ цаг хугацааны машинтай бол тэгээд тэрүүгээрээ дуртай үедээ очиж алдаагаа засах боломжтой бол би юуг яаж засах вэ гэж. Их л юм байна өнгөрсөн рүү эргэж харах тусам эргэж санахаас ч санаа зовмоор юм их байхымаа. Тэрийг ч тэгчихмээр, энийг нь ч энгчихмээр, бүх алдаагаа засчихмаар, алдсан боломжуудаа нөхөөд олчихмоор гээд хамаг шуналтай зан хөдлөөд, төгс төгөлдөрлүү тэмүүлээд явчихлаа. Тэгээд бүх зүйлийг засдагаараа заслаа, алдаа мадаггүй болчихлоо гэж бодсон чинь 

1т Өмнөх шигээ алддаггүй юмаа гэхэд өөрөөр ахиад шинээр алдах л байсан.

2т Эсвэл тэгж алддаггүй юмаа гэхэд одоогын би, би-гээрээ биш өөр хэн нэгэн болчихсон байх байж. Би одоогын өөртөө л хайртай

3т Би шинэ замуудыг сонгох учраас одоогын миний анд нөхөд, үнэт зүйлүүд, үнэнч фэнүүд ;P гэх мэтчилэн бүгд өөр хүмүүсээр солигдох байж, тэднүүс нь ямар ч хүмүүс байгаа билээ, хэн ч байсан би тануусдаа л хайртайм чинь. Гол нь би шинэ замналаараа блог гэдэг замыг нэмж оруулах байсан ч юм уу? үгүй ч юмуу. Завгүй лидер хүний амьдралд блог гэж бараг байхгүй учраас блогчин Батси ч гэж байхгүй байх байжээ.

Ингээд бодохоор миний амьдрал алдаа мадаг олон, өөрчлөх зүйл ихтэй байсан ч гэсэн амьдрал надад авснаасаа илүү ихийг өгжээ. Одоо байгаа амьдралдаа сэтгэл хангалуун байж чадахгүй юм бол яаж өөр амьдралд сэтгэл хангалуун байж чадахавдээ. Батсид цаг хугацааны машин байсан бол шатааж дэлбэлээд устгах юм байна шүү хүмүүсээ ккк. Яахав устгахаасаа өмнө ирээдүй рүү явж Sports Almanac 2012-2080ийг авчихнаа хахаха. 

2011/10/28 13:28  

Харин

Харин лдээ яг сайн хэлж мэдэхгүй л юм, гэж найзынхаа хэлснийг сонсоод залуу яагаад гэж өөрөөсөө ахин асуув. Энэ үг бол түүний хамгийн үзэн яддаг үг. Хар багаасаа л энэ үгэнд баригдаж өөртөө итгэх итгэлээ алдсаар байгаа билээ. Өөрөөс нь болоод ч тэр үү эсвэл өрөөл бусад нь ч тэгж хэлэх дуртайдаа юу тэр залуу мэдэхгүй ч, хэн нэгэнд санал тавих болгонд сонсдог үг нь. Залуу багаасаа аливаа асуудалд алдахаасаа айлгүйгээр шийдэмгий хандаж ирсэн учраас бусдын саналыг ч гэсэн, амьдралаа сүйрүүлэхгүй л бол, зөвшөөрсөөр иржээ. Түүний амьдралын философид "Харин" гэдэг үг, ойлголт огтоос зохихгүйгээс гадна, хэзээ ч ойлгож чадахааргүй зүйл. Тэр алдвал дараачын замыг хайхаасаа илүү алдаагаа засаад өөрийнхөө замаар илүү хурдан урагшлахыг эрмэлздэг. Тийм ч учир бусдаас шийдэмгий, тууштай зан чанарыг хайж нэхдэг. Бусдын олон боломж бололцоотой буюу туйлбаргүй амьдралыг, яагаад өөрсдийгөө энэ байдалдаа илүү тайван, найдвартай, баталгаатай гэж боддогт нь гайхдаг. Залуухан насандаа өөрсдийнхөө эр зориг, найдвараа алдсан найзуудаа хараад харамсдагаа нэг бус удаа хэлж байсан ч тэд "ХАРИН чинийх тэгээд баталгаатай, найдвартай... г.м" өөрсдийгөө өмөөрсөн үгс болон өөрийг нь зөрүүлээд зэмлэсэн үгсээр булуулаад авдаг байлаа. Нөхцөл байдал тодорхой байхад хүмүүсийг яагаад эргэлздэгт тэр гайхаж байнга өөрөөсөө "яагаад" гэж асууна. Өөрсдөдөө итгэдэггүй болохоор бусдад ч итгэдэггүй гэж үү!!! Энэ бол түүний өөрөө өөртөө өгсөн хамгийн оновчтой зөв хариулт нь.

Харин, өөртөө итгээд чамд итгэтэггүйд асуудал байна уу!!!  Чиний боломж бололцоо, түүний боломж бололцоо 2 өөр учир бодоод байна уу? Алдаж болохгүй учраас алдахаасаа айдаггүй хүнтэй хамт нэг замаар явахаасаа эмээгээд байна уу?...........

Залуу бодно. "Харин" 

2012/02/07 15:31 

Би хэн бэ?

Сэтгэлээр унасан бүхэндээ өөрийгөө унагааж болохгүй.

.

Хүн яагаад өөрийгөө бусдаас ингэж дөвийлгөх дуртай юм бол. Бидний бусдыг үнэлэх үнэлэмж яагаад ийм сонин юм бэ?!. Заримдаа миний үзэл надтай хамт төрсөн мэт санагддын. Амьдралаас суралцаад үзэл бодлоо төлөвшүүлсэн тохиолдол их цөөн. Ихэнх нь л бага байхад суучихсан мэт. Бага байхад хүмүүсийг гомдоож байснаа ойлгох тэр цагт өөрийгөө зөв хүн болгоно гэж амлаж... Өөрийгөө хойш нь тавьж өрөөл бусдын доторлуу орсноор... Юу үнэн яавал зөв болоход эргэлзэх тэр л үе... Өөрийгөө хуурч эхэлсэн мэт. Нандин бүхэн минь хуурмаг мэт санагдах... Баг зүүх шаардлагатай болох... Нулимсны утга учирыг өөр зүйлд өгж... Өөрийгөө зүхэж эхлэх тэр цагт... Бүх зүйл хоосон мэт болох. Үнэ цэнэгүйдэж, утга учиргүйдэж, худал хуурмагаар дүүрэх үед... Сэтгэл хоосрож, тэрбумын дунд ганцаардаж, өөрийгөө ойлгохоо болих цагт... Хэн байснаа, хэн байгаагаа, юунд тэмүүлснээ хэзээ ч мартаж болохгүй.

Өөрийгөө алдсан үедээ өөртөө багахан ч болов цаг гарга

2012/03/19 12:06  

Нүцгэн цаасанд нуугдсан бэх

Энэ удаагын блог идэвхжүүлэлт их өргөн цар хүрээтэй болж байгаа учраас оролцохгүйгээр өнгөрч болохгүй юм шиг санагдаад хэдэн үгс бичлээ.

Би ч ямар өөрөөсөө өөр хүн, бодлоосоо өөр зүйлийн тухай бичиж чадах биш өөртөө буулгаад бичнэ дээ.

Магадгүй та ч гэсэн надтай адил баг зүүдэг л байх. Гэхдээ би дургүй лдээ. Хаана ч хэзээ ч өөрөөрөө байхыг хүсдгийн. Хүмүүс намайг яг байгаагаар минь хүлээж аваасай гэж. Гэхдээ дийлэнх нь хэзээ ч тэгж хүлээж авж байсангүй. Хүмүүсийн хар бодолтойнх уу, эсвэл нэгнийхээ өөнтөглөж харах дуртайгынх уу, ямар ч үйл үйлдэл үг бүрт боломжит хувилбаруудаас хамгийн муугаар нь бодно.

Нөгөө талаас үнэхээр зарим нэг зан авир бусадтай нийцдэггүй цор ганц юм бол үүнийг ил гаргаад байх шаардлага байна уу. Ерөнхий энэ 2 тохиолдлоос болоод л хүссэн хүсээгүй баг зүүдэг.

Би бол хоосон цаас шиг, дээр нь хүн дуртай зүйлээ бичиж болохоор, анд найзууд надад өөрсдийн зангаа бичээд хадгалуулахаар, амраг хайрт хайрын үгсээ буулгаад өгөхөөр, аав ээжийн алтан үгс амьдралын ухаан сийлж болохоор тийм хоосон цаас. 

Чишш чимээгүй яг үнэнийг хэлэхэд би бэх байхгүй юу, цаасан дээр өөрийн хүссэнээрээ тодорч харагдаж чадах бэх. 

. 

Нүцгэн цаасанд нуугдсан бэх - Батси

2012/03/21 14:27   

Зөөлөн чамайг өвтгөхгүй

Би бол тэмцэгч... Үнэт зүйлсгүй, хүн чанаргүй, худал хуурмагаар дүүрэн ертөнцтэй тэмцэгч гэхдээ хамт амьдрагч. Халгайн дундаас сарнай ургаж болдгыг харуулахыг эрмэлздэг мөрөөдөгч. Намайг ороох халгайнуудыг өвтгөх гэсэн шиг надад өргөс ургасан тийм ээ би өөрийгөө хамгаалсан. Гэхдээ надаас өндөр ургах хогын ургамлууд миний өнгийг бөхөөх шиг. Гэрэлрүү тэмүүлэх итгэл найдвар, хэнд ч хэрэггүй хогын ургамлуудтай тэмцэх итгэл сэтгэл минь намайг улам бүр зэрлэгжүүлж байх шиг. Хэдэн навчаа унагахаар би тэднээс ялгаагүй мэт, магадгүй тийм байх... Бодол доторх дурсамж минь... хэзээ харсанаа магадгүй төсөөлсөнөө санадаггүй ч өнгө өнгийн цэцэгсээр алаглах тал хэзээ ч мартагддаггүй... Зэрлэгүүд дунд яаж орсоноо мэддэггүй ч өөрийгөө зэрлэг биш гэдгээ мартахгүй! Намайг авахыг хүссэн хүнийг би хатгах байх гэхдээ зүрхэнд нь хэзээ ч сэв суулгахгүй. 

Өнгө өнгөөр алаглах цэцэгсийн хатан болох сарнай шиг болохыг хүссэн ч харагдах байдлаараа би халгай... би үнэргүй, би амтгүй, би хэлбэргүй... Гэхдээ бодол доторх минь зөөлөн чамайг зовоохгүй, бие минь зөөлөн чамайг хатгахгүй, сэтгэл минь зөөлөн чамайг шархлуулахгүй, би өөрөө ЗӨӨЛӨН учраас би чамайг өвтгөхгүй :).

Сарнай шиг гэж өөрийгөө боддог учраас бодол минь зөөлөн, өргөсийг нь урсгал дагуу барихад хатгахгүй учраас бие минь зөөлөн, зэрлэгүүдтэй хамт өсөж байгаа ч сэтгэлд минь ногоон тал байдаг учраас сэтгэл минь зөөлөн. Бодолдоо чамайг зөөлнөөр зурж, биеэрээ мэдэрч, сэтгэлээсээ хайрлаж чадах учраас чиний дэргэд би ЗӨӨЛӨН. (гээд жоохон нэмээд өгчихвөл зүгээр санагдлаа). Гэрэл гэгээг мэдэрч байна уу, энэ юу вэ? ЭНЭ БОЛ ЗӨӨЛӨН

2012/04/03 10:21  

Мэдэрдэг үү, Боддог

Зөөлөн салхи гарыг илэн өнгөрч, үсийг хаялж, цэцэгсийн анхилуун үнэрийг тарааж, орчлонд мэдрэмж нэмж байхыг мэдэрдэг үү? Харин би үүний тухай боддог.

Нарны илч газар дээр тусч, өнгө өнгөөр алаглах цэцэгст гэрэл гэгээ нэмж, харах хязгаарыг чинь тэлж өгж, юм бүхэнд утга учир нэмж байхыг мэдэрдэг үү? Харин би үүний тухай боддог.

Дусал дуслаар аажим унах бороон дусал чам дээр тусч урлагын бүтээл мэт биеийг чинь даган урсаж хэлбэр дүрс хэмжээг чинь тодотгодгыг чи мэдэрдэг үү. Харин би үүний тухай боддог.

Утга төгөлдөр, уянга хослуулсан, уран чимэг энэ хорвоог мэдэрч байхад чинь бодолдоо буулгаж өнгө нэмж, хэлбэрийг засаж, утгачуулж, сэтгэлдээ баясаж мэдэрч байдаг чамайг. Харин миний юу боддогыг чи мэдэрдэг үү?

2012/04/11 11:34  

Өөрөөрөө байх сэтгэл ханамж

Эртээ урьдын цагт энэ ертөнцийн биш өөр нэгэн ертөнц буюу үлгэр домгын газарт, бусдаасаа өөр нэгэн хүн чоно амьдран суудаг байжээ. Хүн чононуудын газарт өсөж төрсөн тэрээр бүх л соёл, ёс заншлыг дагаж ирсэн ч нэг л өөр зүйлийг мэдэрдэг байснаа, чухам яг юу гэдгээ өөрөө ч сайн мэдэхгүй. Тэрээр хүн чононуудын сургуульд явж, хүн чононуудын хэлээр ярьж, хүн чононуудын харьцаагаар харьцаж, ер нь л хүн чононууд яаж амьдарна яг л тэгж л амьдарна. Хүн чононууд ч ингэж амьдрах ёстой гэж сургана. Гэхдээ нэг л биш...
Хүн чоно залуу маань эрийн цээнд хүрч, анд явж өөрийгөө тэжээх чадвартай болсон цагтаа хүний нутагт амьдрах эрдэмд суралцахаар шийдэж эх нутаг, элэг нэгтнээ орхин алс холыг зорихоор шийдэв. Энэ шийдвэрт дургүйцсэн, ундууцсан нэгэн байхад, дэмжиж амжилтыг хүргэсэн нь бас дутахааргүй байсан нь мань эрд урмыг өгч, шийдвэртээ ч бат зогссоор тэртээ алсыг нэгэн өдөр зорилоо. Адгууслаг амьтны доторх бодол нь очих газрынх нь уур амьсгал, хүрээлэн буй орчин, хүлээж авах амьтдын араншин л их сонин санагдана. Очих газар нь соёл иргэншил нь хөгжсөн, тоо толгой нь их, зохион байгуулалт сайтай мөртлөө эмх замбараагүй бужигнасан хөл толгой нь мэдэгдэхгүй, мань эрийн хувьд бол урвуугаараа эргэсэн газар. Нэг зүйл нь адилхан адгууслаг махчид, гүэ яахав соёл гэсэн нэртэй зүйлдээ аймшигт чанараа наачихсан улс лдаа. Тэр газрыг харин цус сорогчдын орон гэдгээр нь бусад адгууснууд маш сайн мэднэ. Хүсэн хүлээсэн мөч ирж шинэ газартаа очиж, цусыг нь уувал ёсыг нь дага гэгчээр бүх зүйлийг тэднийхээр хийж эхлэв. Дутуугаа дүүргэсэн мэт ч дүүрэн нь дундарч улмаар дуусах шиг. Мань эрийн өөрчлөлт өөрт нь ч таалагдхаа больж, хүний газар хүн чоноороо амьдарч эхлэх нь тэр. Өөрөөрөө байх шиг сайхан зүйл үгүй ч олны жигшил зэвүүцлийг хүргэж хүний газар өөрөөр нь байхыг хорьж эхлэв. 

   Хүн чононуудын хажууд өөрөөрөө амьдрахаас биш хүний нутагт хүн чоноороо амьдарч чадахгүйг яс махандаа тултал мэдэрчээ. Магадгүй бид хэзээ ч сэтгэл дүүрэн амьдарч чадахгүй байх. Тухайн мөчдөө, цагтаа үедээ л дундуурхаа дүүргэж, дэргэдэх зүйлүүдээсээ таашаал авах нь, сэтгэл ханамжтай амьдрахыг хэлэх болов уу??? 

   Сиймхий ч гэсэн гэр минь сэгсгэр ч гэсэн эжий минь гэж хар багаас дотносож өссөн төрөлх газраас илүү өөрөөрөө байх газар гэж үгүй.

2013/07/24 17:43  

Толин хүн

Хүн болгоны дургүйг хүргэсэн нэг хүү байж гэнэ. Дандаа хүмүүсийн янзыг үзэж явдаг. Хэн юу гэж хэлнэ үг үйлдэл бүрийг нь дуурайгаад шоглоод үзүүлчихдэг. Хүмүүс түүнийг сармагчин бацаан гэж дуудна. Заримдаа элдэв тоглоом шоглоом нь ихдээд ирвэл хэд гурван алганы амт, эсвэл хараал ерөөл хэлчихнэ. Хөөрхий хүүг өмөөрөх хүн байхгүй болохоор тэр лдээ. Хүү гэхдээ энэ бүх зүйлийг огт ойлгодоггүй байлаа. "Ямар ч нэмэлт хачиргүйгээр өөрийг нь дагаж дуурайхад юундаа тэгж ундууцаж дургүйцдэг юм бол... Өөрийг нь дуурайсны дараа надад гар хүрдэг шиг, өөрсдөдөө бас тэгж гар хүрдэг юм болов уу? Намайг зэмлэдэг шигээ өөрсдийгөө зэмлэдэг болов уу? Намайг тэнэг гэлцгээдэг, өөрсдийг нь байгаагаар нь дүрсэлж үзүүлэх нь тийм тэнэг хэрэг гэж үү? Хошин шогынхон ингэж үзүүлэхэд уг нь инээлдэцгээдэгдээ" гэж учрыг үл олж чадах бяцхан хүү. Хариултаа олон олтлоо дуурайсаар...

Залуу өөрийгөө толинд харна, бодно "Давгүй залуу шүү, нүдэнд дулаахан, өтгөн хөмсөг маань илүү буурьтай харагдуулах шиг, бас шилтэйгээ илүү ухаалаг харагдах юмдаа...". Өдрийг арай хийж бараад орой тэсэн ядан хүлээсэн болзоондоо явлаа. Сармагчин хүүг иртэл бүх зүйл төлөвлөгөөний дагуу явж байлаа. Хүүгийн нүдэнд тэр залуу бусдаасаа илүү тусч, оройны байгаараа түүнийг сонгоод авчихав. Хүү ч хийдгээ л хийлээ. Залуу ундуйцаж хүүхдийн түргэхэн хөөж явуулмаар байсан ч уур амьсгалыг эвдэхгүйн тулд залуу эхлээд хүүд чихэр амлаад явахыг хүслээ, бүтсэнгүй. Болохгүй болохоор нь жоохон чанга дуугарч айлгахыг оролдов, энэ оролдлого хүүд дуурайх урмыг улам өгч ёстой зогсохоо мэдэхгүй үргэлжлүүлэв. Залуугын буурьтай, ухаалаг дүр төрх тэрхэн хором алга болоод хүүд хэд хэд гар хүрээд хашгачиж өглөө. Эргэн тойрны хүмүүс харахад: яг адилхан том жижиг 2 сармагчин гадил жимсээ булааж байгаа мэт хашгачиж тонгочно. Болзоо ч өндөрлөж залуу гэртээ харингаа болсон бүх зүйлийг эргэцүүлэв. Өөрийгөө ахиад нэг толинд харлаа. Энэ удаа тэр баггүйгээр зогсож байлаа. Яг сармагчин хүүгийн үзүүлбэр санаанд орж инээх ч шиг, уйлах ч шиг.

Хөөрхий хүүгийн учрыг олж ядан мэдэх гээд байсан зүйлс нь: Хүүхдийн нүд бүх зүйлийг яг байгаагаар нь хардаг учраас л тэр. Яг өөрөөрөө байх мөчдөө толинд харвал хүүгийн бидний хардаг тэр дүр төрх харагдана. Хүүхдүүд бүх зүйлд зүрх сэтгэлээ зориулж ханддаг учраас, бүх зүйлсийн зүрх сэтгэлийг нь олж хардаг. 

Бид заримдаа өөрсдөөсөө өөрсдийгөө нуудаг. Зарим нэг зан чанараа хүлээн зөвшөөрч чаддаггүй, тийм ч болохоороо тэр зангаа өөрөө мэдрэхээ байчихдаг. Яван явсаар өөртөө өөрөөсөө шал өөр хүний баг зүүцэн явж байдаг. Тэр багыг хэн нэгэн хуулан хаяхад хамаг нүцгэн үнэн нь гарч үнэн гэж бодож байсан хуурамч итгэл үнэмшилтэйгээ нүүр тулдаг. Итгэл үнэмшлээ эвдүүлэх хэцүү ч үнэнтэй нүүр тулсан цагт алцайж зогссон мэт амьдралаас илүү таашаал авж байгаа юм шүү дээ хүүхдүүд минь :P хаха.

"Өөрийгөө алдсан үед өөртөө багахан ч гэсэн цаг гарга."

Альберт Эйнштэйны 3дахь үе, монголын анхдагч баггүй амьдрагсдын нэг, "Баггүй хүмүүс" холбооны тэргүүн, "Бодит үнэн" академийн жинхэнэ гишүүн, Дэлхийн баггүй холбооны ерөнхий нарийн бичгийн дарга,  "Хүүхдийн нүд ба толины тусгал" цуврал ботийн зохиогч  

Эйнштэйны БАГТси

2013/05/20 21:45  

Магадгүй

Өвөрмөц... тийм ээ энгийн байлгаж болох байсан ч өвөрмөц над дээр туссан. Гүн гүнзгий ухуулаагүй ч үнэрийг чинь, амтыг чинь, өгөх бүхнийг чинь би мэдэрч таашааж байдаг. Би бодлоо, мэдрэмжээ, өөрийгөө, бүхнээ зөв илэрхийлдэггүй ч үйлдэлээрээ, үгээрээ, буруу болгоноо засахыг хүсдэг. Зөв буруу, үнэн худал, байгааг байхгүйтэй нь хамтдад нь туурвиж орхидог, Би ноороглохоо мартдаг нийтлэгч. Эсрэг цэнэгрүүгээ таталцах соронз мэт... өнгийг минь алдуулахгүйн тулд тоос хүртээдэг зөгий мэт энэ бүхэн Юу гээч зөн совин гэж байдаг бол би мэдэрдэг яг үүнийг. Асуултнуудын минь хариултууд авцалдаагүй мэт, төсөөлөл минь бодит биш мэт, үнэнг илэрхийлэх зүйлс өөр мэт үед би амгаланг зүгээр бодолгүйгээр мэдэрч чадах юм шиг учраас л тэр... Заримдаа бодолдоо орооцолддог, харин заримдаа юу ч боддоггүй.

Би өөрөө юуг мэдрүүлдэг, бодогдуулдаг, санагдуулдаг бол... энэ асуултын хариуг магадгүй мэдэх хэрэггүй байх. Зүгээр л би мэдэрч байгааг мэдэх хэрэгтэй... магадгүй

2012/04/23 01:39 

Санамсаргүй үзэгдлүүд

Санамсаргүйгээр мөрлөлцсөнөөс болоод нэг нь гэмтэл рүү нэг нь шорон руу явж байна. Дараа дараадаа санаж явахгүй бол...

Санамсаргүйгээр харц тулгарснаас болоод дурлаад, хайрлаад, бүтэлгүйтсэнээс болж нэг хүний зүрх шархалж байна. Дараа дараадаа санаж явахгүй бол...

Санамсаргүйгээр хэлснээс болоод хэн нэгнийг гомдоож үл ойлголцож байна. Дараа дараадаа санаж явахгүй бол...

Санамсаргүйгээр юу ч үйлдсэн бай гарах үр дагаврыг нь тооцоолж чаддаггүй учраас бүх л зүйлийг санаж бодож явахгүй бол дараа дараадаа гэмшиж, толгой гудайхгүйн тулд... 

Гэхдээ санамсаргүй явдлууд адармаатай, ядаргаатай, сэтгэлд сэв суулгадаг ч амьдралыг амттай, өрнөлтэй болгож эцэст нь дурсамжтай, илүү туршлагатай болгосон байхымдаа гээд нээх хөөрхөн жоохон идэвхжнээ.

2012/05/01 10:49  

Дотно

Үйлдэлээ бүрээрээ өөрийн хэлэх үгсээ илэрхийлсэн, инээвхийлэн байх чинь цаанаа нэгийг хэлсэн, надад хэлэлгүйгээр миний өмнөөс шийдчихдэг чи юу гээч...

Үгс бүр нь үнэн бүрийг шингээсэн, үнэ цэнэ нь үүндээ ч орших шиг, амаа нээхээс минь өмнө түрүүлээд хэлчихдэг, ярилгүйгээр хараад бүх үгсээ ойлгуулчихдаг чи юу гээч...

Өөрийн харцаараа бодлоо хэлчихдэг, үйлдэж ярилгүйгээр өөрийгөө ойлгуулчихдаг, өндөр зэрэглэлийн нууцлалтай мэт боловч өөрт минь л ойлгуулагдхаар харж чаддаг чи юу гээч...

Юунаас ч илүү ойр санагдах, хэнээс ч илүү мэдэрч чаддаг, өөрийн ертөнцөө холбож чадсан чамайг би ДОТНО гэж нэрийдье. 

2012/05/10 01:52  

Амьдрах итгэл

    Намуухан долгиолох далаан давалгаа хөлөгт онгоцыг сэм сэмхэн ирж мөргөх чимээ, зөөлөн салхи чихний хажуугаар өнгөрөн гарахдаа лимбэдэн байгаа нь байгалын симфони оркестрийн цогц аялгуу мэт байгаа нь дуранч залууд нэн таатай бөгөөд сар орчим далайд төөрсөн сэтгэлийг нэг л тайтгаруулах мэт. Одтой тэнгэр нь харагдахаа больж үүлт тэнгэрээр солигдсон цагаас эхлээд хүнд өвчнөөр өвдсөн далайн ахмадаа сэрэн сэртэл эх газрыг олно гэдэг сохор хүнээр зүү сөвлүүлэх мэт хэцүү санагдана. Өдөр шөнөгүй эх газрыг олох гэж дурандах энэ залуу нас биенд дөнгөж хүрмэгцээ амьдрал үзэхээр эх нутаг, элэг нэгтнүүдээсээ холдон, анхны уулзалтаар итгэлийг нь олж авсан ахмадыг даган далайд гарсан нь энэ. Хоол унд, цэвэр усны дутагдлаас авахуулаад ахмад нь эдгэрч, эх газрыг олно гэсэн итгэлээ алдаж эхэлцгээсэн далайчид өдрөөс өдөрт галзуурч эхлэх мэт энэ үед энэ залуу л өөртөө энэ бүгдийг аварч эх газрыг олж харж чадах мэт итгүүлнэ. Уртаар үргэлжилсэн эдгээр бүрхэг өдрүүдийн энэ л шөнө түүний нүдэнд гэнэт оч гялбана. Ажиглаваас гялалзаж харагдах од мэт... сайтар дурандвал орчлонгын хамаг сайхныг мэдрүүлсэн итгэл найдварын гэрэлт цамхаг гэрэл гэгээгээ эргэн тойрондоо цацруулна. Тэр хэт их өөртөө итгүүлснээс болоод хий хараад байна уу?.. Аль эсвэл үнэхээр тэнд гэрэлт цамхаг байгаа үгүйг ялгаж чадсангүй. Гэхдээ түүний нүүрэнд инээмсэглэл тодорчээ... Түүний итгэл түүнийг ахиад цааш амьдруулна :-).

2012/05/22 01:52  

Батсигын нууц :P

Хүн болгонд байдагчилэн хувийн нууц надад ч бий. Энэ нууцуудаа аль хэдийнэ оршуулчихсан гэж байгаа. Харин миний сонирхол бол тайлагдашгүй нууцуудыг олж мэдэх. Ямар сайндаа харь гаригынхныг харах боломж олддог л юм бол шинжилгээний задлан нь болсон ч яахав гэж боддог. Дэлхий сүйрэх нь тодорхой болвол бирмудын гурвалжинруу очно гэж байгаа. Аз таараад өөр цаг үед очих ч юм бил үү. Гүүглээс хайдаг зүйлүүд нь цасны хүн, далайн гүн дэх хачирхалтай амьтад, эгэл бус хүмүүс заримдаа метафизик сонирхоно.

Ер нь энэ бүхний эхлэл нууц нь миний бүх зүйлийг сонирхдог, тухай бүрт нь яагаад гэж асуудагт л оршино. Багаасаа л шувуу яагаад нисдэг юм бол? Хүнд далавч залгавал нисэх болов уу? Дельфин яаж нарийн долгионоор харилцаад байна? Хүний сонсож мэдэрч чаддаггүй авиа дууны долгионыг яагаад зарим амьтад маш сайн хүлээж авч чадаж байна, аянга ниргэж цахилгаан цахихад яагаад гэрэл нь түрүүлж харагдаад дуу нь сүүлд сонссогддог юм бол, яагаад хүмүүс амьтдаас илүү ухаантай байгаа юм болоо гээд л, бусдаас болон өөрөөсөө асуудаг байлаа.

Энэ сониуч зан маань намайг байгалийн шинжлэх ухаанруу татаж оруулсан юм. Байгаль дэлхий дээрх нууцуудыг хууль болгон ил гаргах, чадвал тайлбарлах. Энэ бол миний болон манай салбар нэгтүүдийн гол зорилго. Нууцыг ил болгох бол миний ажил. Хувийн нууцаас бусдыг нь дэлгэнэ.

Нууцлаг мөртлөө нууцанд дургүй Батси

2012/05/24 15:53 

Төсөөллийн өрөөнд

Сайн уу гэх хоолой жирийн эмэгтэйнх авч хэн нэгний зүгээр л эргэлдэх дуртай газрын шалтгаан. Аав ээждээ үргэлж хүүхдээр харагдах тэр... өөр нэгэнд бүсгүй хүний төгс дүр төрх үргэлж үүрд... Ээжээс минь өөр сайхан бүсгүй гэдэг ойлголт... тэнэгтэх шалтгааны эзэн чи надтай ажил хэрэг яриад байгаамуу эсвэл яруу найраг шүлэг уншиж өгөөд байна уу? Ажил тараад нөхөрт чинь хүргэж өгөх цорын ганц хамтдаа байх боломж... 

Зөвхөн чи... гэхдээ зөвхөн чи ч байдаг болохоороо биш чамтай холбоотой бүх зүйлс энд байдаг учраас би очих дуртай... дуртай ч гэж одоо бол донтсон. Магадгүй чиний төсөөллийг би өөрийнхтэйгөө ганцхан энд л нийлүүлж урлаж чадна.... яг л бидний хүссэн шиг. Чи бид өөрчлөгдсөн ч энд л ганцхан өөрчлөгдөхгүй юмдаа. Заримдаа бид өөрсдийгөө хэт мартаад байх шиг... тэр тоосонд дарагдсан хүзүүвчийг харалдаа, хамтдаа нохой авахаараа зүүлгэж өгнө гэж байсан одоо ч нохой манатай болоо юудаа. Тэр чигээрээ хөндийрөөд нэг л хоосон ч юм шиг оргиод байх чинь. Чиний надтай ганц ярилцдаг газар чинь болохоор... чамайг надруу инээлгэж харах шалтгаанууд чинь зөвхөн энд байдаг л болохоор... надаас өөр... надтай холбоотой зүйлсээс өөр юу ч байхгүй болохоор... энд л би хамгийн эрхэм нандин зүйлсийг мэдэрдэг учраас чамайг энд хорьчихсон. Чамтай л байхын тулд би төсөөллийн өрөөндөө өөрийгөө бас цоожилчихсон. 6 жилийн өмнөх дүрээр чинь л энд мөнхөд хадгалаад... энд л өөртөө үнэнч ханданадаа...

2012/09/01 18:04  

Хуучнаараа

Хүн болж бүрэлдэхээс авахуулаад, алхаж гишгэж бүдэрч унаж, алдаж онож, яаж ч өсөж торниж он жилийг үдсэн ч эхийн үр хүүхдээ гэх сэтгэл хуучнаараа.

Хүүхэд байх үеэс мөр мөрөө түшилцэж, болж бүтэхгүй бүх л зүйлийг хамтдаа туулсан нэг насны найзууд салаа замаар явсан ч андуудын нөхөрлөл хуучнаараа.

Анхны гэх нандин бүхнийг хамтдаа туулж, мэдэрцгээсэн, амраг хайрын нандин холбоо салах ёстой тавилангаар салсан ч... биесээ харах харц хуучнаараа.

Тогтворгүй зан төлөв амьдралтай байхад нь учран нийлж, амьдралын том даваануудад зарим заримдаа алдаж онож, итгэл хугарах мөчүүд тохиолдсон ч, хэн хэн байснаа ч мартатлаа он жилийг хамтдаа туулсан ч эхнэр нөхрийн хайр хуучнаараа.

2013/03/10 08:41  

Цэцэрлэгчин

Тэр газарт хуучин шигээ өвс ногоо ургамал ургаж, үзэсгэлэнт гол горхи урсахаа байжээ. Хагдарч хуучирч цөлжиж эхэлсэн хязгаар нь үл харагдах газрыг цэцэрлэгчин орхиж явснаас хойш тордож өндийлгөх өөр хэн нэгэн байхгүй байсан учир, өдрөөс өдөрт өнгөө алдсаар одоо элсэн шуурга эргэлдсэн, ан цав үүссэн хүйтэн хөндий газар болон хувирсан байна. Энэ газарт өмнөх цэцэгчин өөрийн хайр халамжаараа тордож, бүхий л сайхан зүйлсийг хийж аз жаргалаар бялхуулж байсан юм. Уг нь энэ газрын хаалгаар нэвтэрч чадах онцгой нэгэн байсан юмсан. Яг хүссэн газар нь биш учраас цэцэгчин уг газрыг орхисон байж магадгүй л юм. Тэр цэцэрлэгчин өөр газар очоо болов уу? эсвэл одоо хүртэл яг өөрт тохирох газраа хайсаар яваа юм болов уу? Буцаж ирэх болов уу? Энэ хаалгаар нэвтэрч чадах өөр цэцэрлэгчин оршин байдаг юм болов уу? Тэр цэцэрлэгчнээс өөр цэцэрлэгчин энэ газрыг диваажин болгож чадах болов уу? гэх мэт бодлууд эргэлдэнэ уг хөндийн газрын эзэнд бодогдоно. Баяр хөөр, аз жаргал нь цөхрөл зовлон хорсолоор солигдсон ч итгэл найдварын нар нь хэзээ ч жаргаагүй билээ. Хаалгаар нэвтэрч чадах толин тусгал мэт тэр л цэцэрлэгчнээ хүлээсээр...

2014/01/07 01:03  

Мэдлэг мөн хэрэггүй мэдээлэл

Сүүлийн үед хүмүүс мэдлэгээрээ чамирхдаг болж. Надад бол таалагдаж байгаа. "Мэдлэгийг ашиглаж чадсан үед л хүч болдог" гэдэг үг байдаг. Зарим нэг хүмүүс маш их мэдлэг, мэдээлэл цуглуулсан байдаг ч түүнийгээ ашиглаж чаддаггүй. Олон зүйлээс хамаарах байх л даа. Гэхдээ миний бодлоор бол өөрийн эзэмшсэн олж авсан мэдлэгэндээ таарсан мэдээлэл олж авч чаддаггүй болохоор л тэр байх. Хүмүүс мэдлэггүйгээсээ болж их алдана. Мэдсээр байж алдана гэдэг бол тэнэгийнх байх. Өнөөгийн нийгэмд мэдлэггүй байна гэдэг нь нүдээ аниад гүйхтэй адил. Хэрэггүй мэдлэг гэж байдаггүй. Чи л ашиглаж чадахгүй байна гэсэн үг.Харин хэрэггүй мэдээлэл гэж бий. Мэдээлэл бол мэдлэгийг чинь ашигтай зарцуулахад чинь чиглүүлж өгдөг. Хэрэггүй мэдээлэл толгойг чинь хогийн сав болгохоос гадна, мэдлэгийг чинь юунд ч хэрэггүй болгож хувиргана.Хэрэггүй мэдээлэл чиний сэтгэн бодох чадварыг чинь үгүй хийнэ. Яахав яриа өдөхөд хэрэг болж магадгүй л юм.

Жишээгээр тайлбарлах гэж үзий. Нэг номноос уншиж байсын: Нэг залуу АХА маягийн тэмцээнд оролцож байна гэнэ. Мэдэхгүй зүйл гэж алга, хаа байсан Африкт урсаж байгаа голын тухай мэдэж байна гэнэ. Үүнийг үзэж байсан номны автор болон найз захирал 2 ярилцаж байна:

Захирал: Хэрвээ би энэ залууг ажилд авбал хэр хэмжээний цалинг өгөхийг мэдэж байна уу?

Автор: 3000$ эсвэл түүнээс их мэдэхгүй юм аа.

Захирал: Үгүй. Энэ мөнгө дэндүү их байна. Ийм залууд жилд 300$ магадгүй насан туршид нь өгөхөд ч болно, эсвэл их ч байж магадгүй. Энэ хүний мэдэж байгааг лавлах толь юм уу? Интернэтээс амархаан мэдээд авч болно.

Мөн Эйнштейнээс сурвалжлач физикийн энгийн тогтмол тоонуудыг асуухад Эйнштейн мэдэхгүй байсан бөгөөд

Эйнштейн: Би иймэрхүү хэрэггүй зүйлүүдээр толгойгоо дүүргэдэггүй, иймэрхүү зүйлүүдийг физикээр сурдаг бараг бүх хүмүүс мэднэ би тэднээс асуугаад л мэдээд авчихна гэж хэлсэн байдаг.

Гадаадад сурдаг найзтайгаа нэг удаа ярьж байсийн: Америкт программын чиглэлээр сурдаг залуугаас Бразил гэж хаана байдаг вэ? Юугаараа алдартай вэ? Гэж асуухад юу ч мэдэхгүй бараг тийм улс байдаг юм уу гэж хариулна. Харин Монголчуудаас асуувал: Америк тивд байдаг хөл бөмбөгөөрөө алдартай, ёс заншил нь тийм гээл мэдэхгүй зүйл бараг байдаггүй байх. Харин Америк залуугаас программынх нь талаар асуувал илүү гарна уу гэхээс дутахааргүй мэднэ гэж хэлж  байсын. Тэдний мэдлэг мэдээллийн түвшин гүн харин биднийх өргөн цар хүрээтэй юм шиг санагддаг. Тийм ч учраас нарийн мэргэжилтэнгүүд Монголд ховор байдаг байх.

.

Ер нь хүмүүс мэддэггүйгээсээ ичдэг. Хэрэггүй юм мэдэж байснаас мэдээгүй нь дээр. Тэгэхээр бид хэрэгтэй, хэрэггүй баахан л мэдээллээр толгойгоо булуулж. Үр дүнд нь сэтгэх чадваргүй, хүний хэлсэн ишлэл татаж ирээл утга учиргүй баахан л юм ярьцгаадаг тэнэг, мангар хүмүүс л болцгоодог. Би лав ингэж боддог юм. Та нар юу гэж бодож байна?

2010/1/22 12:00 

″ҮГ″-ээр оролдохуй

Хүмүүс чинь ҮГ гэдэг үгийг олон янзаар ашиглах юм. Тэгээд би зарим нэгнийх нь утгыг ойлгохоо ч байлаа. Анх үгийг чин сонсдог л гэж ойлгодог ойлголт маань нам цохигдсон л доо. Тэрийг чинь барьдаг, хардаг, амталдаг, мэдэрдэг, зарим нэг нь хаздаг  гэж зүүдлээ ч гүй явлаа. Гэвч зарим нэг хүмүүс физик биетэй мөн химийн шинж чанартай болгож байхым. Ямар ямар үгнүүд гэхээр

Үг мушгих: Хувцас мушгидаг шиг. Тэгэхээр үг нордог болж таарж байгаамдаа.

Үг өлгөх: Нойтон үгийг мушгисан бүрэн хатаахын тулд мэдээж өлгөнө. Ээ дээ миний логикыг хэхэ :D

Үгэн дээр дөрөөлөх, улмаар босох: Морь унах гэж байгаам шиг дөрөөлөөд 2 хөл дээрээ босохыг хэлээд байгаа юм уу даа.

Үг зөөж ярих: Гарт баригддаг нь нэгэнт тодорхой болцон юмчэн энэ ч бол ойлгомжтой л доо.

Үг дэгээдэх: ҮГ нь явдаг, түүнийг нь дэгээдэж унагаадаг байх нь..

Үг гуйвуулах: Үгийг архиар шахангуут, үг нь согтоод гуйвах нь байна.

Үг сөрөх: Үг нь усны урсгал шиг, эсвэл салхи шиг байдаг бөгөөд өөдөөс нь харж алхахыг хэлнээ.

Жинтэй үг, даацтай үг хэлэх: Үг нь масстай, массгүй гэж 2 янз байдаг юм шиг байгаан.

Үгэн дээр тоглолт хийх: Тайз, эсвэл томоохон заал л болж таарч байгаам даа хихихи Одоо концерт хийх байна шд. Эсвэл спорт тэмцээн ч юм уу? хэхэхэ

За ёр нь тэгээд өшөө зөндөө ийм ҮГ-нүүд байнаа. Хэлц үг гээд явчхаар бүүр балраад балайраад байгаам. Одоо ингээд өндөрлий дөө. Та нар нэг бодоод үзээрэй ход ход хихи :P.

Үгээр оролдсон Батси

2010/2/25 15:03  

!!!Харь гаригийнхнийг идэцгээе!!!

Найзтайгаа дээр үед ярьж байсан яриагаа сийрүүлье гэж бодлоо.

Харь гаригийнхантай холбоотой яриа дэлхийн үүслээс эхэлсиймаа. Нөгөө баахан таамгуудаас хамгийн оновчтой нь дэлхий дээр, амьд биет байсан гаригийн солир дэлхийг ирж мөргөснөөс дэлхий дээр амьдрал бий болсон гээл 2лаа санал нийлээл яриагаа цааш үргэлжлүүллээ. Тэгээл баахан мутаци, эволюци, нийгмийн хөгжил дэвшил, хүмүүсийн сэтгэл зүй гээл ярьж ярьж байгаад

Найз: Ийм олон ертөнц байгаа юм чинь ахиад амьд биет орших магадлалтай биздээ гэнэ.

Би: Тиймээ. Магадлал бол байгаа.

Найз: Ямар юмнууд байдаг бол. Эртний Маяа болон тэр үеийн улсуудыг харь гаригийнхан бүтээсэн байх боломжтой гээл ярьж байгаал. Ер нь харь гаригийнхан дэлхийруу довтолвол хэр хурдан устгагдах бол гэлээ.

Би: Харин ч манайхан хядийшд. Төрөлх өссөн газар дээрээ байна гэлээ.

Найз: Битгий тэнэгдээд бай. Тэд нар чинь хэдэн ч сая гэрлийн жилийн цаанас ирж байгаа. Дээд оюун ухаантай, зэвсэг нтр нь бол тээ гээл стар фарс яриал, бие хаа бол чухам далайн ёроолын гүнд ч задрахааргүй юм ярьж байна.

Би: Чи хараачгүй байж... Тэд нар чинь энд ирсэн ухаалаг байж болох ч бие организм бүтэц нь ямар ч юм билээ. Амьдардаг гариг нь юунаас ч бүтсийн бүү мэд. Үнэндээ нил уураг тархи болсон нялцанхай амьтан ч юм билүү, эсвэл уснаас харшилтай, зэвсэгүүд нь хүчилтөрөгчтэй газар ажилладаггүй, өт шиг юмнууд тахиа шувууны хоол ч юм билүү эсвэл бүүр цэлцэгнүүр шиг гоё амттай байж ч магадгүй шд гээд л хэллээ.

Найз: Нээрээ тийм юм байна шүү.

Би: Тийшдээ (Мундаг царай гаргаж байгаал хэлж байгаамаа)

Тэгээд үүгээрээ юу хэлэх гээл байгаан гэвэл объектоо судлаагүй байж дүгнэх, үйлдэл хийж хэрэггүй шүү. Тэр чинь юу ч байж болно, яадаг ч байж мэднэ. 

Юм болгонд өөрийн гэсэн сул тал байдаг, мөн өөрийн гэсэн давуу чанар. Энэ 2 зүйл хамт байжээж тэр зүйл бодит оршин тогтоно. Төгс зүйл гэж байдаггүй. В.И.Батси

Харь гаригийнхнийг мяалсан Батси

2010/3/26 13:57

Нөхөрлөл=Хэрэгцээ

(Сайн найз гэдэг ойлголт тусад нь авсан шүү.)

Хэрэглээний буюу хэрэгцээний найз

Найз гэдэг бол тухайн үе дэх хэрэгцээг нөхөж чаддаг хүнийг найз гэж нэрлэнэ. Чамд тухайн үед яг ямар хэрэгцээ хэрэгтэй байна түүнийг чинь нөхөж чаддаг хүнийг чи найзыгаа гэж хэлдэг. Ихэнх хүмүүс урмын үг хайрладаг, зовох үед хамт байж чаддаг буюу зовлон хуваалцдаг гэх мэтчилэн яг өөрт сэтгэл санаа, эд мөнгөний хэрэгцээ бий болсон үед туслаж чадсан хүнээ дажгүй сайн найзаа гээд боддог. Нэгэнт найз нь юм чинь бас эргүүлээд хэрэг болсон үед нь туслаж дэмжих, хамт байлцах гээл бас л хэрэг болсон үед нь хэрэгцээг нь нөхөлцөнө шүү дээ. Аан эндээс нэг юм гараад ирж байгаа юм. Чиний найз чинь чамд хэрэгтэй юмаар чинь тусалдаг мөртлөө чамаас дургүй зүйл ч юм уу чадахгүй зүйлээр чинь тусламж гуйвал... Эсвэл зүгээр л чи түүнд найз шиг нь байгаад харин чамд найз шиг чинь байж чадахгүй бол... Ийм нөхөрлөл бие биенийхээ хэрэгцээг нөхөж чадахгүй болтлоо үргэлжлэнэ. (Та нарыг юу гэж боджаагааг гадарлаж байна дөө цццц)

Эсвэл хэрэгцээний өөрчлөлт юм аа. Жишээ авахад бие биенийхээ чих болон амны хэрэгцээг хангадаг (бие биедээ амьдралаа ч юм уу ямар нэг юм аа ярилцдаг найзууд :) ) найзуудын хувьд нэг нь түрүүлээд эхнэртэй болж хамтын амьдрал зохиодог ч юм уу, эсвэл бүүр түрүүлж хүүхэдтэй болвол яах вэ гэж. Мэдээж түрүүлж гэр бүлтэй ч юм уу хүүхэдтэй болсон хүн бол тэр бүхнээ ярихыг хүснэ. Алдсан үедээ бусдаас туршлага судалмаар, зөвлөгөө авмаар байдаг гэтэл тэр найз нь хүний амнаас хүн болгон бараг сонсдог шахуу зөвлөгөөнөөс өөрийг хэлж өгч ярилцаж чадахгүй. Энэ тохиолдолд найзын бат бөх байдал нь хэр их олон зүйл дээр хамт ярилцаж чадна төдий чинээ нөхөрлөл бат оршино. Харин хүссэн сэдвээр нь ярилцаж чадахгүй тохиолдолд нөхөрлөлийн утас улам бүр нарийсч тасрахдаа хүрнэ. Гэх мэтчилэн бүх л зүйл дээр үүнийг авч ярьж болно.

За тэгээд найзууд гэж хэн бэ гэдэг олон төрлийн тодорхойлолт байдаг энэ бол зөвхөн миний л харсан өнцөг, найз гэж ийм талаас нь авч үзэж болохын гэж л хэлж байгаам. За тэгээд та хэдэн нөхдийнхөөс хэр зөрж байна. Минийхтэй санал нийлж байна уу гүй юу? Яриад байгаарай

Энэ бичлэг утгын хувьд явцуу болсон байна. Угаасаа ч найз гэдгийг тодорхойлно гэдэг үнэхээрийн тэнэг зүйл (Би тэнэгтэж онолдсоноо мэджээнэ). Найз бол олон төрөл гэхдээ та нар дунд яг ийм найзууд байж магадгүй. Байдаг ч байх. Хүнд ер нь олон найзууд байдаг шүү дээ. Цэцэрлэгийн найз, байрны найз, ангийн найз, их сургуулийн найз, найзын найз, сонирхолоороо нэгдсэн найз тэгээд өөр юу байдгын шоуны найз гэх мэтчилэн. Гэхдээ саяны нэрлэсэн найзууд бол бүгд сайн найзын хэмжээнд байж чадахгүй болов уу. Зарим нэг нь анги, байр, гудамжных учраас сонголтгүй найз болсон харин зарим нь тохиолдлоор түр зуур зам нийлж найзалж байгаа гээл чанартай үлдээд насан туршдаа дэм болох хүн бол тун ховор шүү дээ. Миний хэлээд байгаа найзлалтын чанар бол тухайн үед танд юу хэрэгтэй болж байна түүнийг чинь нөхөж чадах та ч бас түүнийхийг нөхөөд өгчихдөг  нөхөрлөл юм.

Зовох үед найзын чанар танигдана гэдэг тэгэхээр зөвхөн зовлонг чинь сайн найзууд чинь хуваалцаж чаддаг байх нь. Итгэлийн нандин холбоог илэрхийлдэг хайр дурлалаас ч илүү байж мэдхээр зүйл бол итгэлцлийн нөхөрлөл юм шүү. Таныг найзын тэнгэр эвээг :P.

Найзаар онолдсон нөхөрсөг Батси :)

2010/4/29 14:13  

Нүүдэл(Бодол дотроо бодно.)

Хэсэгтээ л сайхан амарлаа. Биеийн хувьд биш сэтгэлийн хувьд бас сэтгэлгээний хувьд. Бараг л тархиа ашиглахгүй явлаа болдог ч гэсэн бүтэхгүй юм байна. Хэн гэдгээ мэдэх гэж яваад олон ч зүйлийг үзэж, ихийг ч тунгааж бодлоо. Бодсоор байгаад бодолдоо орооцолдоод, ядраад, өөртөө амралт өгсийм. Хүн амарвал амраад л байдаг юм байна. Амралт гэдэг хүнийг амраахаас гадна хүнийг их өөрчилж, унхайгүй, арчаагүй, туйлбаргүй, амьдралаас хол, тэнэгдүү байрын болгожийншүү. Тэгээд өөртөө дүгнэлт хийгээд амралтаа зогсоохоор боллоо. Энэ бол нэг төрлийн шинэ эхлэл шүү. Эхлэл гэдэг нэг л тааламжгүй... аргагүй шд хэн гэдгээ хайхаар явсан хүн шинээр эхлэнэ гэдэг ухралт авч эерэгээр ашиглаж чадвал өөрийгөө апдейт улмаар апгрейдлэчихэж ч болох л юм. 

Ингээд хуучин бичлэгээ оруулья даа.

Нүүдэл(Бодол дотроо бодно)

Эцэс төгсгөлгүй асуултууд, хариулж эс чадна. Яаж ч бодсон хариугүй, эсвэл сонголт эцэст нь гарч ирнэ. Тооцоолж боломооргүй боломжууд, алийг нь ч алдмааргүй шуналтана. Адаг сүүлд нь хоосон хоцорно, би нүүхээ мартчихаж. 

. 

Нүүдэл болгоноо тооцолох уу? нүдээ аниад гишгэх үү! Насан туршид минь сонголт байх уу? Эсвэл ганцхан сонголттой болтлоо ухаарахгүй явах уу! Боломж байсаар байх уу? Боломжоо харж чадахгүй болтлоо сохрох уу! Амьдралынхаа турш бодсоор байсан боловч, хэзээ ч алхаж үзсэнгүй. Би яаж алхахыг мэдэхгүй юм байна :-o

. 

Одоо байгаа мэдлэгээрээ би насан туршынхаа төлөвлөгөөг гаргаж чадахгүй. Гаргалаа гээд ч тэгж явахгүй, бүтэх ч үгүй. Хэрвээ яг тэгж явдаг л юм бол өөрийгөө ахиж дэвшээгүйд тооцоорой. Ямар өндрөөс гараагаа эхлэх нь чухал биш, ямар замаар ямар хурдаар нүүх нь чухал. Нүүж байхдаа суралц. Суралцчихаад нүүнэ гэж байхгүй(Хүн насан туршдаа сурдаг). Чулуунд бүдрэхээс бүү ай, дараагын чулуунд энэ насандаа ахиж бүдрэхээргүй болно. Хүн хүнээ л хайрладаг болохоос биш, хүмүүс хүнийг хайрладаггүй. Бид дандаа би гэдэг хүнийг устгана. Бид мөн бие биенээ устгана. Өөрөө өөрийгөө хайрлаж сурсан хүн өөр хүнийг хайрлана, мөн өөр хүнээр хайрлуулж сурна. Хайр гэдэг итгэлийн дээд хэмжүүр, итгэл гэдэг хүний амьдрах урам, харин урамаар чиний хөдөлгөөний баттай байдал хэмжигдэнэ. Ингэснээр чи урагшилж бага ч болов асуултандаа хариулт авна даа.

. 

Би гэсээр өөрийгөө зоригжуулсан бодлоо зогсоож, би чадах болов уу гэсэн бодлоо тээсээр алхалж эхэллээ. Одоо түүний нүдэнд эргэцүүлсэн бодол, очих зогсоолууд нь л харагдаж байна. Тэрээр үл тасалдах үзэг мэт нүүсээр бодол дотроо бодол хөвөрүүлнэ

2010/11/04 16:58  

ЛГБТ талаарх миний бодол

Монгол дахь ЛГБТ хүмүүс 7 хоногийн аян өрнүүлэн өөрсдийн үзэл бодлоо илэрхийлж дуу хоолойгоо гаргаж байгааг далимдуулан мөн ЛГБТ хүмүүсийн талаарх өөрийнхөө бодлыг хэлье. 

.

ЛГБТ хүмүүс далд байх нь нийгэмд сөрөг нөлөө үзүүлнэ яг хар тамхи, биеэ үнэлэлттэй адил. Бид ЛГБТ хүмүүс нийгэмд ил гарвал бидний хойч үе болон үр хүүхдүүдэд сөрөг нөлөө үзүүлнэ гэж ярилцдаг. Энэ бол худлаа яагаад гэвэл нэгт хүн бэлгийн чиг хандлагаа сонгодоггүй байгалаас заяамал. Хоёрт намайг лав жоохон байхад Гамбууш гэж нөхөр байж л байсан тэр надад нөлөөлсөн юм лав алга. Надад гей найз ч байна тэглээ гээд би түүнийг дуурайгаад гей болчихоогүй л байна. Нөгөө талаасаа хувь хүн гэдэг утгаар нь авч үзэхэд өөрсдийгөө илэрхийлж чадахгүй айдастай амьдрана гэдэг хүсэх зүйл лав биш. Мөнхийн түгшүүр айдас хэн намайг мэдчих болоо гэсэн айдас. Үзэн ядалтаас айх айдас. Бидний тэдэнд үзүүлж байгаа сөрөг хандлага тэднийг нийгмээс тусгаарлаж сэтгэцийн эмгэгтэй юу ч хийж мэдхээр хүн болгож хувиргана. 

.

Мөн ижил хүйстнээ сонирхоно гэдэг гаж бэлгийн чиг хандлага биш. Гаж бэлгийн чиг хандлага байна лдаа. Тэрийг олон улсын хүрээнд яаж тодорхойлдог вэ гэхээр сээгсийн харилцагч нь сээгсдсэнээс гарах үр дагаврыг тооцон бодож чаддаг, мөн зөвшөөрч байвал үүнийг эрүүл бөгөөд зөв гэнэ. Тэгэхээр нас биенд хүрсэн хүмүүс өөрсдийн тохиролцсоноор бэлгийн хавьталд орох нь ямар нэг гаж буруу гэх зүйл байхгүй. Харин гаж гэдэг дотор

хүүхэдтэй хавьтах: Дээр өгүүлсэнчлэн хүүхэд нь сэкс хийснээс гарах үр дагаврыг тооцоолж чадахгүй, мэдэх ч гүй учираас. 

амьтантай хавьтах: Харилцан хавьтагч нь зөвшөөрч байгаа үгүй нь тодорхойгүй.

Цогцостой хавьтах: Энэ бол миний бодлоор гажаасаа гаж. Хамгийн гаж нь. Яаж үхсэн хүнтэй юу яаж чаддаг байнаа балиарийн

Товчхоноор бол ийм л байна. Надад тэднийг үзэн ядаад байх юм алга. Аан бас тийн хүмүүс нэг зүйлээс бас айдын тэднийг өөрсдийг нь хүсээгүй байхад нь сонирхоод уруу татах вий гэж. Тийм юм бол мэдэхгүй юм байна. Манай найз лав гей хүнийг сонирхоно уу гэхээс страйт хүнийг бол сонирхохгүй шд. Тэдэнд бас өөрсдийн гэсэн хэмжүүр байгаа шд. Аан бас нэг юм саначихлаа хүмүүс хүлээн зөвшөөрдөг болчихлоо гэхэд тийм хүмүүсийн тоо ихэснэ гэдэг тэр бол худлаа далд байсан зүйл ил болж байгаа нь л тэр. Сая татварын өршөөх хууль батлагдахад яав хэдэн тэрбум төгрөгийн газар доорхи баялаг гарч ирэв үүнтэй л адил. Хүний эрхээр ажилладаг байхдаа олж авсан багахаан мэдлэг мэдээллээ хуваалцлаа.

2010/11/22 15:28 

Гол нь мэдрэмж шүү дэй

Сонирхол энэ бол аливаа нэг зүйл хийх хөдөлгөх хүч болдог. Сонирхож эхэлснээр тухайн зүйлээ судлаж, оролдож эхэлдэг.

Мэдрэмж сонирхож байгаа зүйл нь ямарваа нэгэн төрлийн мэдрэмж өгдөг. Хэт муухай биш л бол ахиад тэр мэдрэмжийг авахыг хүсдэг. Хэрвээ таалагдвал ахин дахин тэр мэдрэмжийг авахыг оролддог.

Таашаал нь авч буй энэ мэдрэмж нь таалагдсанаар олон дахин авах сэдэл, хийлгэх хүч нь байдаг.

Олон дахин таашааж хэрэглэснээр энэ сүүлдээ мэдрэмж өгч, таашаагдхаа больж зүгээр л Хэрэгцээ болдог. Хэрэгцээ нь сүүлдээ ямар ч амтгүй, өнгөгүй, хаямаар байвч хаяж болдоггүй хогын новш мэт санагдах нь ч бий.

Ер нь хүн ямар ч сонирхолоо хийж үзэж шинэлэг мэдрэмж болгонтой учирч, түүнээсээ таашаал авдаг байх хэрэгтэй. Харин байнга иддэг лапшаа шиг л болгож болохгүй. Шинэ мэдрэмж авах гэж оролдох, шинийг мэдэрч чадахгүй бол хаяж байх хэрэгтэй. Хэрэггүй хэрэгцээнээсээ салцгаая.

.

Элдэв бусын хэрэгтэй, хэрэггүй зүйл хэрэглэгч Батси

2011/01/17 16:04  

Сонголт

Ялгаа ≠ ялгаварлал. Хэлэх гэж байгаа санаа нь бол бидний ялгаатай байдал нь ялгаварлан гадуурхах шалтгаан биш ээ гэж. Угаас төрсөн ах дүү 2 хүртэл хоорондоо өөр байдаг. Тийм атал бие биенийгээ дийлэнх олонхоос нь өөр гэж ялгаварлах нь хамгийн тэнэг бөгөөд ухамсар дорой нэгний хийх үйлдэл гэж бодож байна.

Багадаа, бүрэн төлөвшөөгүй байхдаа бусдыг ялгаатай байдгаас нь болоод их л гадуурхаж, шоолж, дооглож, илүү үзэж, ялгаварладаг байж билээ. Өөрөө ч гэсэн зарим нэг талаараа тэгж шоолуулна. Одоо бодоход би бусадтай ихэвчлэн адилхан эсвэл адилхан болж харагддаг байсан тулдаа бага шоолуулдаг байжээ. Би бусадтай дийлэнх зүйлээрээ адилхан (нийтлэг) байсан учраас л тэр. Миний өссөн философи бол ийм л байх ёстой гэсэн сургааль үгс. Би ч түүндээ уусч ийм л байдаг байхгүй юу? гэдэг нийтлэг нэгэн болж байсан. Хувь хүн, хувийн үзэл бодол, хувийн өмч ер нь хувийн гэдэг үг орсон болгон их муухай, аминчхан, хувиа хичээсэн, өөдгүй, новшийн санагдана. Зүгээр л Ардчилсан нийгмийн социалист эрэг шураг л юмдаа.

Харин сонголт гэдэг зүйл намайг өөрчилсөн юм. Буруу сонголт хийвэл хариуцлага хүлээнэ. Хэдий тийм ч хариуцлага гэдэг зүйл хүмүүсийг нийтлэг байдлаас хувь хүн болгодог. Бас зөв сонголт хийвэл ашиг шим хүртэнэ. Сонголт хийдэг болоход бусдыг хүлээн зөвшөөрнө. Яагаад гэвэл өөрийн онцлог байдлыг харж сонголт хийдэг учраас бусдыг бас онцлог гэдгийг нь хүлээн зөвшөөрнө :). 

Тэгээд Сонголт хүн бүхэнд ирдэг. Харин харамсахгүй л сонголт хийх хэрэгтэй. 

2011/01/25 15:54  

Би энгийн гэвч өөр

Бүх зүйл энгийн харин хүмүүс өөрсдөө сүржин учир бүх зүйлийг сүртэй болгодог юм. Энгийн байх нь адилхан байна гэсэн үг биш,өөрийн онцлогоор амьдар. Энгийн бөгөөд өөр.

Батсизм

Энгийн, эгэл, байдаг л... гэвч өөр.
Би бүх зүйлийг л энгийн гэж боддог. Энэ нь миний нүдэнд сайхан харагдах биш, сэтгэлд сайхан санагдахуулдаг зүйлд дурладагтай холбоотой биз.
Би өнгө үзэмжид тийм ч их ач холбогдол өгдөггүй, харин дотоод гоо сайханд уяран хайлдаг.
Би ухаалаг үг яриатай хүнийг биширдэггүй, харин уялдаа холбоотой үйлдлүүдтэй хүнийг хүндэлдэг.
Би байшингийн сайханд татагддаггүй харин чанарыг нь сонирхдог.
Би хуучны туршлагаас суралцаж шинэлэг сэтгэлгээгээр, хөгшчүүлийг хүндэлж залуучуудыг дэмждэг, дэмжигддэг.
Хэн нэгэнд алдаа өгөхөөсөө илүү үйл явдлын процесст нь алдаа тохдог.
Найзыг туулсан жилээс нь илүү сэтгэлээр нь дүгнэдэг.
Бренд хувцаснуудыг нүүр бардам байлгадаг гэж бодохоосоо илүүтэйгээр хүнд хамгийн тохиромжтой хувцаснуудыг хийдэг гэж боддог.

Би би би..... Би гадаад ертөнцөөс илүү дотоод ертөнцийг магтан дуулагч байна. Хэдий миний бодол ийм боловч би гоо зүйн мэдрэмжгүй гэсэн үг биш, гаднаас  нь авч хэлэлцдэггүй хэнхэг гар ч биш, би бол эгэл жирийн бусдаас өөр хүн байна. 

2010/03/01 17:09

БАТСИ

Би багаасаа дуу багатай, ичимхий, дотроо бодолтой хүн байсан. Сэтгэл хөдлөл, эмоцоо дотроо нуучихна. Аливаа зүйлийг хийж, оролдож, ярилцаж байж шийдэх, аргыг нь олохоосоо илүү логикоороо бодож хариуг нь олж дүгнэлт хийх дуртай байсан. "Суугаа цэцэнээс, явган тэнэг нь дээр" гэдэг билүү энэ зүйр цэцэн үгний утгыг өөрийн биеэр амсаж ойлгосон.

.

Анхны зүйл болгон дээр үнэ цэнэтэй хандаж, дараа дараагын зүйлүүдийг үл тоосон. Шинэ мэдрэмж, шинэ амт, шинэлэг бүхэнд оноо өгсөн, нэг л өдөр шинэ зүйл гэж байхаа больсон. Ахин шинээр амтлах, эсвэл нэг зүйлээсээ өөр зүйлийг мэдрэх хэрэгтэй болсон. Ингэж би хуучнаа сөхсөн, бүх зүйлийг өөрөөр харсан. 

. 

Тэмцэл гэдэг үгийг бусадтай жишиж ойлгодог байсан. Бусдаас илүү гэж өнгөцөөр ойлгогдож л байвал тэмцэлд өөрийн ялалтаа байгуулдаг байлаа. Үнэндээ өөртэйгөө ганц ч удаа тэмцэж байсангүй. Тавьсан зорилгодоо хүрэх нь чухал гэж үздэг байсан. Ямар аргаар хамаагүй. Өөртөө дүгнэлт хийсэн, өөрийгөө муулсан, өөрийгөө шинэчлэх арга замуудыг бага багаар олсон. Өөртэйгөө тэмцэж эхэлсэн.

Сонголтгүй амьдралаар амьдардаг байсан. Сонголтгүй амьдралд хариуцлага ч байсангүй. Сонголтыг нэг л өдөр хийж эхэлсэн. Сонголтын үр дагавруудыг амссан. Онохоосоо алдах нь их байсан. Алдаанаасаа болж олон зүйлийг алдсан. Алдахаас маш их айдаг болов. Алдаад амьдралгүй болчих юм шиг бодол толгойд минь суучихав. Алдалгүйгээр бүх талаас нь харж суралцаж чадахгүйгээ ойлгосон. Албаар алдаж эхэлсэн. Алдаан дээрээсээ суралцаад зарим зүйл дээр алдалгүйгээр онодог болсон. Алдаанаасаа ухаажсан. Сонголт надад хариуцлагыг өгч, хувь хүн болгож төлөвшүүлж эхэлсэн.

Ингээд би туршлагыг үнэлдэг болов. Үг сонсож, үгний цаадхыг ухахыг оролдогч болсон. Үнэн, худал үгийг үл ялган алдсан. Үгэнд цэнзүүр тавьж эхэлсэн. Үг ч гэж утга шүү дээ. Утгагүй үгсийг хэрэглэхээ болихоор шийдсэн. Гэвч би блогчин болсон :Pккк. Утгагүй үгсээр зэвсэг хийж хүн инээлгэх оролдлого удаа дараа хийв. Амжилтыг олж эхлэв :D. Харин эндээс шал өөр түүх эхэлнээ ахихихи.

"Бид блогыг биш блог биднийг сонгодгым." Энэ замруу орсон л бол буцна гэж үгүй (нэг урсалтай юм шиг байгаан). Аан ер нь бол энэ бичлэгээрээ блог бичилгүй их удлаа, нэг юм бичийдаа, гар загатнаадэйнаа л гэжаам шүү дээ. Харин зарим нэг нөхдүүд бичихгүй яаж байж чадаадайнаа айн.

2011/06/19 21:51  

Үнэнгийн теором by ″Батси″

Үнэн гэх үгний утгыг судалсан бодлоо хэдэн мөртөөр илэрхийлэх гээд оролдлоо.

Нийтлэг үнэн (туйлын үнэн) гэж байхгүй бөгөөд нэг хүний үнэн л гэж байна. Яахав хэсэг бүлэг хүмүүсийн хамтын үнэн гэж байж болно.  Үнэн бол итгэл үнэмшилдээ тулгуурласан бодол. 

"Өнөөдрийн үнэн маргаашын худал". Бидний итгэж үнэмшсэн зүйл маань бидний мэдлэг, мэдээлэл ахиж дээшлэх тутам өөрчлөгдөж хувьсаж байдаг. Бид бүх зүйлийг мэддэг болсон ч гэсэн мөнхөд орших үнэн гэж байхгүй. Яагаад гэвэл түүнийг мөнхөд үнэ цэнэтэй байлгах объект байхгүй шүү дээ.

Хаа газрын үнэн өөр. Усыг нь уувал ёсыг нь дагаа гэж. Уг нь орон зайнаас хамаарсан үнэн их өргөн утгатай. Даанч би бээр мунхаглан бичих гээд ч чадал хүрэхгүй нь дээ.

Үнэн гэдэг бол хүмүүсийн итгэл үнэмшлээ, цаг хугацаа болон мэдлэг мэдээллээс хамаарсан, орон зайд тухайн нэг хүний үүсгэж байгаа олон утгат үнэ цэнэ. Нэг ёсондоо физик хэмжигдэхүүн юм :P чигшиг

Миний бичсэн бүхэн ч гэсэн үнэн биш байж болно. Үнэнтэй нуур тулгарах хэцүү ч үнэнг хүлээн зөвшөөрнө гэдэг агуу. Эрт үеэс л хүмүүс итгэл үнэмшилтэй болохын тулд үнэнг эрж хайсан. Юмс болгонд үнэний үнийг өгсөн. Гэхдээ бүх зүйл, бүх хүнд үнэн биш шүү дээ!!!

Итгэл үнэмшилээ эвдүүлэх бүрт тэсвэрлэшгүеэ.

Үнэнтсэн Батси :P

2011/08/02 14:11